????????????????????????????????????

Lasal enternasyonal (ICCS) ti’n ankonbre Sanmdi swar avek bann fans veteran mizisyen Joseph Louise, osi koni konman Ton Joe.

I fer 4enm fwa ki spektak ‘Joseph Louise and friends’ i ganny fer, me mannyer bann spektater ti pe kriye, danse e aklanmen, bokou ti a krwar ti son premye fwa.

Safwasi sa konser ti’n ganny organize konman enn bann aktivite lo progranm 32enm Festival Kreol.

Dapre sa santer tou sa 600 tiket ki ti anvant ti’n fini vann detrwa zour avan spektak e ti annan menm ki ti ankor pe telefonnen pour nobou ganny enn.

Stanley Monnaie, Antoinette Dodin, François Larue, Philip Toussaint, Guito Mondon, George Payet, Daniel Larue e plizyer lezot santer ti prezan pour donn zot prestasyon.

«Si tou i mars byen nou pou fer enn [lot spektak] le 7 Desanm e dan sa show mon annan en albonm Nwel ki mon’n fini prepare. Mon pou release li sa zour,» Ton Joe ti dir avek enn nou zournalis.

E mannyer dimoun ti pe defoule ler bann sanson Ton Joe — tel parey ‘Tou maler mon prezan’ e ‘Ou pa pou may mwan’ — ti pe ganny zwe, i paret ki sikse sa 5enm show an Desanm in fini garanti !

Bann portre ki akonpanny lartik i montre en pe lanbyans pandan sa show dan ICCS Sanmdi swar

E.P./Seychelles NATION