En koup sorti Baie Lazare – Marc ek Fatima Benoit –  ti pran par dan sa 6enm edisyon Maryaz Tifin ki ti ganny akeir par distrik Beau Vallon.

Msye ek Madanm Benoit ti swiv en seremoni maryaz tradisyonnel Dimans apremidi, ki ti form parti bann aktivite sa 32enm Festival Kreol.

Prezan kot sa seremoni — ki ti enkli laserenad, romans, diskour, zet bouke, gato kreol ek konfitir papay tournen — ti Minis pour Lazenes, Kiltir ek Spor Mitcy Larue parmi manm fanmiy ek zanmi sa koup, osi byen ki plizyer envite 3enm-az ek bann etranze.

Msye ek Madanm Benoit ti beni zot maryaz Sanmdi dan parwas Anse Boileau.

Sa koup ti dir ki zot ti akeir sa loportinite pour pran par dan Tifin kan zot ti ganny sa propozisyon sorti kot organizater sa aktivite Jessie Freminot.

“Sa lavi maryaz ki nou’n deside mon kwar i pou mars tre byen akoz depi lo konmansman ziska la mon war li pe mars tre byen e mon swete i ava dire ziska nou lanmor,” Madanm Benoit ti dir.

Msye Benoit pe ankouraz bann zenn pour pran lavi maryaz e viv en lavi ver Bondye.

Ser nouvel marye, Myrtill Bacari, ti dir sa maryaz ti enn ki ti tre vivan e ki in byen apresye ki zot in kapab relev sa tradisyon.

“Bann dimoun aze i profit sa lokazyon pour vin reviv sa koutim lontan. I enportan pour fer sa Tifin akoz sa se nou tradisyon e bann zenn i sipoze pran par dan bann aktivite koumsa en fason ki ler nou ale sa tradisyon pa perdi,” i ti dir.

Source : Seychelles NATION