En maryaz kouler, stil ek kreativite

Senk zenn stilis Seselwa ek en stilis sorti Izrael ti demontre zot talan ek kreasyon lanmod tradisyonnel ek modern atraver Fon Lanmal 2017, en de

????????????????????????????????????

file lanmod ki form parti bann aktivite lo progranm Festival Kreol.

Lannwit ti konmans avek en dinen kreol kot Berjaya Beau Vallon Bay swivi par sa senk koleksyon ki ti en  melanz kouler ti ganny demontre par bann mannken Telly’s Modelling Agency.

Premye koleksyon ki ti annan pour tit ‘Tradisyonnel o gou modern’ ti ganny fer par Johanna Didon ek Petra Richard.

Zot koleksyon ti en melanz pti zip, rob ek pti lars ki nou bann gran paran ti mete e ti osi enkli en seri lenz maryaz.

Dezyenm koleksyon ti enkli bann kaftan, lenz lans ek lenz detann kree par Paquerette Lablache ki propriyeter Mangouya Studio.

Son koleksyon ki ti ganny enspire par fey vya ek fey bannann, ti swiv par en koleksyon triko Sesel par Seylingo.

Koleksyon sa stilis, Ronny Julius, in ganny fonde lo kiltir, foklor e ideolozi Seselwa.

Dernyen koleksyon par zenn stilis lokal Karine Dupouy (Kankan) in ganny enspire par diferan fler Sesel ek en melanz kouler Afriken.

Bann model ti osi defil dan lenz en artis enternasyonal ki sorti Izrael apele Shani Zimmerman.

Son koleksyon ti annan en latous mediteraneen ek dezer Mwayenn Oriyan an servan diferan kalite latwal tel ki koton, lez, silk, chiffon, leather.

Ti osi annan bann performans mizikal par bann artis renonmen tel ki John Wirtz, Philip Toussaint, Michelle Marengo, Travis ek Joenise Juliette.

Manmzel Dupouy ti dir ki son koleksyon ki’n ganny enspire par laflor ek lafonn Sesel i anvant dan son laboutik kot Kankan.

«Mon byen kontan pour partisipe menm si letan ti kourt e pour lannen prosenn mon anvi vin avek en keksoz pli meyer avek en stil pli Kreol,» i ti dir.

Msye Julius in dir ki i’n fer en bon swa pour pran par dan sa defile lanmod e ki i kontan ki mannyer tou keksoz in deroule pour son premye fwa.

«Mon ankor pe konstrir mon brand e sa Fon Lanmal i sa platform ideal pour ede promot mon bann kreasyon,» i ti dir.

Madanm Lablache i dir ki i’n deza pran par dan bann edisyon Fon Lanmal oparavan e sa lannen i’n vin avek en stil diferan avek dan lepase.

«Sa lannen nou’n servi en kantite lanprent e in ganny anbelir avek riban. Mon satisfe avek outcome akoz ou kapab vwar ki in sorti tre byen,” i ti dir.

Manmzel Zimmerman ki’n deza pran par dan plizyer defile lanmod dan diferan pei ti dir ki i byen kontan pour vin Sesel e met devan son koleksyon.

«Mon ti anvi demontre bann stil ki annan Izrael e sa koleksyon ti osi ganny enspire par danser Isadora Duncan. Parkont sa i enn bann sitiasyon pli difisil ki mon’n deza pas ladan vi ki mon’n ganny zis 2 erdtan pour prepar tou keksoz,» i ti dir.

Tou bann stilis ti ganny prezante avek en bouke fler par Minis pour Lazenes, Kiltir ek Spor Mitcy Larue.

Bann portre ki akonpanny lartik i montre bann mannken pe parad dan bann diferan koleksyon lenz kree par sa senk zenn stilis Seselwa e sa enn sorti Izrael.

 Source : Seychelles NATION