1boulotNou tou nou rapel Bolot Feray ki ti orizinalman ganny ekrir par Madanm Geva René e plitar met an senn konman en pyes teat par Madanm Marie-Therèse Choppy, avek bann akter prensipal parey Allain Belle dan rol Bolot Feray, Antonia Gabriel dan rol Pyerlin, Charles De Commarmond dan rol Ti Sarl, Merna Chetty dan rol Serafin e Raymonde Onezime dan rol Mafines.

En group artis in deside re-adapte sa pyes teat anba tit ‘Divors Bolot’, ki safwasi pou ilistre bann diferan letap ek prosedir apre ki Bolot ek Pyerlin in marye e apre maryaz ensi ki bann diferan fakter ki ti enfliyans en tel levennman ki kapab anmenn ziska divors.

Bolot Feray i rakont ziswar en zonm dan son karantenn lannen ki ti’n tonm anmoure pour premye fwa dan son lavi e deside pour marye. Laswit i tourn otour bann senn baze lo bann krwayans ek prensip lontan, pli presizaman bann lannen karant ek senkant.

Meter ansenn sa nouvo pyest teat, Michel Desnousse, in fer resorti ki Seselwa pou sa voyaz dekouver ki pou arive avek Bolot ek Pyerlin apre maryaz, eski zot pou divorse ?

«Sa voyaz zot pou ganny sans dekouver zistwar apre maryaz ant Bolot ek Pyerlin, tou bann letap apre maryaz ki sa koup in fer fas avek, ziska menm petet divors. I pou en pyes teat komik, avek bokou leson pour aprann,» Msye Desnousse in dir.

2boulotSa voyaz pou annan nouvo akter ki pou fer zot riye parmi Joseph Sinon dan rol Bolot Feray, Verna Payet Mondon dan rol Pyerlin, Jean-Marc Volcy dan rol fakter, Najoie Philoe dan rol dalon Pyerlin, Christine Reginald dan rol avoka Pyerlin ek Vincent Isaac dan rol ziz.

Si ou anvi reviv Bolot Feray ek Pyerlin, desann sa wikenn dan Sant Konferans Enternasyonal (ICCS), Sanmdi le 21 ek Dimans le 22 Oktob aparti 7.30 diswar.

Tiket i kout R200 e pe vann kot laboutik Tanmi e kot Konsey Nasyonal pour Lar (NAC).

Source : Seychelles NATION